NGONO, UPENDELEO, MADUDU MISS TANZANIA-2

NA MICHAEL MAURUS

SHINDANO la urembo ni miongoni mwa matukio makubwa ya michezo na burudani duniani, likiwa na msisimko wa aina yake, kuanzia kwa wasichana washiriki hadi wadau wa kinyang’anyiro hicho.

Inaelezwa kuwa ukiachana na fainali za soka za Kombe la Dunia na Michezo ya Olimpiki, fainali za shindano la Urembo la Dunia (Miss World), ndilo linalofuatia kwa umaarufu, likishuhudiwa ‘live’ na mamilioni ya watu katika mataifa mbalimbali.

Katika toleo la juzi Jumanne, nilianza kwa kutoa historia fupi ya shindano hilo, jinsi nilivyopata fursa ya kulifahamu, lakini pia wadau ambao nimewashirikisha kuongeza uhondo zaidi wa simulizi hii, wakiwamo wanahabari, waandaaji na baadhi ya washiriki wa kinyang’anyiro hicho.

Pia, nilitaja baadhi ya warembo ambao wamepitia shindano hilo na sasa wakiwa ni masupastaa wa nguvu hapa nchini, wakiongozwa na Wema Sepetu, Mheshimiwa Jokate Mwegelo na wengineo wengi.  

Hata hivyo, katika orodha ya wadau wanahabari wanaolifahamu zaidi shindano hilo, niliwasahau rafiki zangu wa nguvu, Seleman Mbuguni na Dinna Ismail, ambaye kwa bahati nzuri, nilisoma naye Ruvu Sekondari, iliyopo Mlandizi, Pwani mwanzoni mwa miaka ya 1990.

Dinna enzi zake alikuwa ni moto wa kuotea mbali, alikuwa ni mrembo mwenye mvuto hasa kuanzia sura na hata umbo lake, kiasi kwamba hadi walimu walikuwa wakitamani vipindi vya darasani visiishe. Japo kwa sasa ni mama wa watoto kama watatu hivi, lakini bado wamo.

Kabla sijaendelea na visa nilivyokutana navyo nikiwa njiani kuelekea China, hebu niwaletee mapito na mafanikio ya safari ndefu ya shindano la Miss Tanzania.

Katika nilivyogusia juzi, mashindano hayo yalianza miaka ya 1960, japo yalianza kupata umaarufu zaidi mwaka 1994, yaliporejea tena rasmi baada ya awali kuzuiliwa na serikali kwa kuwa yalikuwa yakikiuka maadili ya Kitanzania.

Kwa kawaida mashindano hayo ambayo hufanyika kila mwaka, yamekuwa yakisubiriwa kwa hamu kubwa na mashabiki wa fani hiyo na hata wale wasio mashabiki ambao kwa kiasi fulani wako tayari kusikia au kuona tu nani anakuwa Miss Tanzania mpya kisha kuendelea na hamsini zao.

Hamasa ya shindano hilo imekuwa ikijengwa na mambo kadhaa kwa muda wote tangu mwaka 1994, pale mfumo wa patashika hiyo ulipoanza kuchukua sura mpya ya kiuchumi kwa washiriki na hasa washindi.

Ni mashindano ambayo yamekuwa yakipanda chati kila mwaka kutokana ukubwa wa zawadi zake, fursa za ajira kwa washiriki hasa katika biashara ya mitindo na matangazo.

Hata hivyo mashindano hayo yamekuwa pia yakipitia magumu kutokana na changamoto za kimaadili, kwa nyakati fulani kuonekana kama hayaendani na maadili, hasa katika suala la mavazi.

Hili si kwa Tanzania pekee, changamoto hii ipo pia katika nchi kadhaa duniani na kwa haraka dhana kubwa inayohusishwa hapo husababishwa na hisia au imani kuwa mashindano hayo huchochea biashara ya ngono.

Hapa kwetu rekodi zinaonyesha tulianza mashindano hayo mwanzoni mwa miaka ya sitini, japo hayakuwa katika mfumo wa kitaifa zaidi na mrembo wa kwanza alipatikana mwaka 1960, akiwa ni Theresa Shayo.

Lakini baadaye shindano hilo lilikuja kupigwa marufuku na Serikali chini ya utawala wa TANU kutokana na kuonekana kwenda kinyume na maadili.  Hiyo ilikuwa mwaka 1967.

Mabadiliko ya kiuchumi yaliyotokea nchini wakati wa utawala wa awamu ya pili chini ya Serikali ya Alhaji Ally Hassan Mwinyi, yalichangia kubadilika kwa mfumo wa kijamii nchini hivyo kutoa mazingira ya kurejea tena kwa mashindano hayo mwaka 1994.

Wazo la kurejea kwa mashindano hayo liliasisiwa na Hashimu Lundenga aliyeamua kumshirikisha Prashant Patel ambao kwa pamoja waliishirikisha hoteli ya White Sands ya jijini Dar es Salaam na kulirejesha shindano hilo.

Lakini kama ilivyo kawaida ya kitu chochote katika hatua za mwanzo, mwaka huo (1994) maaandalizi yake hayakuwa ya kishindo na shindano lilishirikisha washiriki wachache wasio wa uwigo sahihi kulingana na upana wa nchi.

Hata hivyo, mrembo Aina Maeda alifanikiwa kubeba taji mwaka huo na kupata tiketi ya kwenda Miss World.  Hatua ya Aina kwenda kwenye shindano la dunia na kutangazwa kwake kwa kiasi kikubwa na vyombo vya habari, ambavyo navyo ndiyo vilianza kuwa vingi kulingana na mabadiliko hayo, kulisaidia mno kuanza kukua kwa shindano hilo .

Ni kutokana na kukua kwa mvuto wake ndani ya jamii, taratibu makampuni na mashirika mbalimbali yalianza pia kujitumbukiza kwa njia ya udhamini hali iliyoanza kuyaboresha hasa katika suala la zawadi.

Makampuni hayo yaliamua kujishirikisha na mashindano haya kama njia ya kutangaza bidhaa zao kwa minajili ya kupenya katika soko.

Makampuni mengi yalianza kujikita na zawadi kuimarika ambapo mwaka 1997, mrembo Saida Kessy kutoka mkoa wa Arusha alikuwa wa kwanza kupata zawadi ya gari dogo la starehe, Nissan, chini ya udhamini wa sigara ya Aspen.

Hiyo ilikuwa kama chokoza nyuki ambapo udhamini katika Miss Tanzania ukazidi kuchukua kasi. Makampuni makubwa yaliyokwishajitosa kwenye udhamini wa Miss Tanzania ni pamoja na Kibo Breweries (kupitia Pilsner Ice), OK Plast Limited (Ocean Sandals), kinywaji cha Redd’s, Vodacom Tanzania, Bodi ya Utalii na wengineo, ikiwamo Kampuni ya New Habari (2006) wazalishaji wa magazeti ya Bingwa, Dimba, Mtanzania, Rai na The African; na wengineo.

Tangu kuanza kwa shindano hilo, mafanikio ya juu yalipatikana mwaka 2005 pale Nancy Sumary alipotwaa taji la Miss World Afrika, akiwa amefanikiwa kutinga hatua ya sita bora ya michuano hiyo iliyofanyika nchini China katika Jiji la Sanya. Zaidi ya hapo, Tanzania imekuwa ikiishia katika hatua za awali kwenye shindano la dunia.

Kimsingi, shindano la Miss Tanzania, limekuwa na utaratibu mzuri katika mchakato wa kuelekea kumpata mshindi wa taifa, kwa kuanzia ngazi za chini kama ilivyo kwa soka na netiboli ambako kuna madaraja tofauti kabla ya kufikia lile la juu, Ligi Kuu kwa soka na Ligi Daraja la Kwanza kwa netiboli.

Hata hivyo, mwaka huu mratibu wa shindano hilo, Basila Mwanukuzi, amebadili mfumo wa kupata washiriki ambapo amehamia kwenye kufanya usaili kwenye kanda mbalimbali, lengo lake likiwa ni kuona kama anaweza kuboresha mfumo wa kuwapata warembo bomba na wenye sifa zaidi.

Miaka ya nyuma, wawakilishi wa taifa, hutafutwa kuanzia ngazi ya vitongoji, kanda na baadaye taifa, ambapo mshindi mmoja wa kuiwakilisha nchi hupatikana.

Katika mchakato huo, ubora wa washiriki na hatimaye mshindi, hujengwa na waandaaji wa ngazi za vitongoji, ambao iwapo watashindwa kusaka warembo wenye sifa na vigezo vinavyostahili, ni dhahiri kuwa taifa haliwezi kumpata mrembo ambaye anaweza kuiwakilisha nchi katika shindano la dunia.

Kwa muda mrefu sasa, mashabiki wa urembo nchini wamekuwa wakihoji sababu za wawakilishi wa nchi kushindwa kufurukuta katika shindano la dunia, na mara nyingi wamekuwa wakiitupia lawama kamati ya kina Lundenga kuwa imeshindwa, aidha kuwatafuta au kuwaandaa warembo wao.

Ni kutokana na malalamiko hayo, hata warembo wenyewe wamekuwa wakijichanganya katika kujieleza mara baada ya kuwasili nchini kutoka kwenye shindano la dunia.

Wakati wengine wakidai wameshindwa kutamba kutokana na maandalizi duni, wengine hudai katika shindano la dunia kuna upendeleo, huku wengine wakisema historia ya nchi yetu ndiyo inayotuhukumu, kwamba haijulikani ndiyo maana warembo wake huwa hawapewi kipaumbele.

Kwa bahati nzuri, Nancy aliwaumbua wote waliowahi kusingizia ubaguzi au historia ya nchi yetu, pale alipowabwaga warembo wenzake wa Afrika, na kutwaa umalkia wa bara hili.

Juu ya matarajio ya Watanzania kuona kuwa mrembo wetu siku moja anatwaa taji la dunia, Lundenga alisema katika mahojiano maalumu naBINGWA kuwa hilo ndilo lilikuwa lengo lao.

“Watu wanatakiwa kuondoa imani ya kuwa mrembo wa Tanzania lazima atwae taji la dunia, tusihukumiwe kwa hilo hata kidogo, kwani kama mwaka huu mrembo wetu hatashinda taji la dunia, ina maana mwaka ujao tusishiriki?

“Shindano letu lina manufaa makubwa kwa jamii, kwanza tunaitangaza nchi, linatoa ajira kwa washiriki na watu mbalimbali kwa njia moja ama nyingine, kuongeza vipato vya wasanii, vyombo vya habari kupitia matangazo wanayoyapata ya shindano letu, pamoja na mambo mengine mengi mazuri,” alisema Lundenga kabla ya kumkabidhi ‘kijiti’ Basila.

Lundenga aliyashukia makampuni na mashirika mbalimbali hapa nchini kwa kushindwa kuwatumia warembo katika shughuli mbalimbali, hasa zile za kampeni zinazowahusu vijana, akitolea mfano ile ya kupiga vita janga la ukimwi.

“Makampuni na mashirika mbalimbali huwa hayawatumii warembo katika shughuli zao kama kampeni dhidi ya ugonjwa wa ukimwi au hata sekta ya utalii, ambako vijana, hasa hawa warembo wakitumiwa, wanaweza kufanikisha zaidi shughuli hizo kuliko inavyokuwa kwa viongozi wenyewe kupanda majukwaani kufanya hivyo,” alisema.

Kutokana na hali hiyo, wadau wa fani hiyo wamekuwa wakilalamikia hali hiyo, wakihoji iwapo wasichana wazuri wapo Dar es Salaam pekee, japo wameshindwa kufahamu kuwa hata wale wanaoshiriki mikoani, huwa wanatokea katika jiji hilo.

Warembo waliotwaa taji la Miss Tanzania tangu mwaka 1994 na kanda wanazotoka.

1967 Theresa Shayo Dar es Salaam

1994 Aina Maeda                                 Dar es Salaam

1995 Emily Adolph                           Dodoma

1996 Shose Senare                               Dar es Salaam

1997 Saida Kessy                                  Arusha

1998 Basila Mwanukuzi                      Kinondoni

1999 Hoyce Temu                                   Ilala

2000 Jacqueline Ntuyabaliwe         Ilala

2001 Happiness Magesse                   Temeke

2002  Angela Damas                         Ilala

2003 Sylvia Bahame                         Temeke

2004 Faraja Kotta                                Kinondoni

2005 Nancy Sumary                         Kinondoni

2006 Wema Sepetu                          Kinondoni

2007 Richa Adhia                                 Kinondoni

2008 Nasreen Karim                          Mwanza

2009 Miriam Gerard Mwanza

2010 Genevieve Emmanuel Temeke 

2011 Salha Israel Ilala

2012 Lisa Jensen Dar es Salaam

2013 Brigitte Alfred Kinondoni

2014 Happiness Watimanywa Kinondoni

2015 Lilian Kamazima Arusha

2016 Diana Edward Kinondoni

2017 Julitha Kabete Dar es Salaam

2018 Queen Elizabeth Makune Kinondoni

2019 Sylvia Sebastian Mwanza

Kwa leo tuishie hapa, usikose nakala yako ya BINGWA la kesho kuendelea kupata simulizi hii ya kipekee ya mashindano ya Miss Tanzania na warembo wake kwa ujumla, ikiwamo jinsi msimulizi alivyoponea chupuchupu kwa machangudoa Miss World nchini China. 


Leave a Reply

Your email address will not be published. Required fields are marked *

*
*